4 نومبر کو، لان چھانگ -میکانگ تعاون کے گیارہویں وزرائے خارجہ کا اجلاس بیجنگ میں منعقد ہوا۔ اجلاس کے بعد، کمیونسٹ پارٹی آف چائنا کی مرکز ی کمیٹی کے سیاسی بیورو کے رکن اور چین کے وزیر خارجہ وانگ ای نے مشترکہ صدر ملک، تھائی لینڈ کے نائب وزیر اعظم اور وزیر خارجہ سیہاسک پھوانگک ٹکیو کے ساتھ میڈیا سے بات چیت کی ۔
وانگ ای نے کہا کہ لان چھانگ -میکانگ تعاون کا گیارہواں وزرائے خارجہ اجلاس کامیابی سے منعقد ہوا ہے۔ تمام چھ ممالک کے وزرائے خارجہ نے اتفاق کیا کہ چین اور میکانگ کے پانچ ممالک کی تقدیر کے اشتراک کی بنیاد مسلسل مضبوط ہو رہی ہے، فریقین کے درمیان تجارتی حجم 500 ارب امریکی ڈالر سے تجاوز کر چکا ہے، جو کہ چین اور آسیان کے درمیان تجارت کا تقریباً نصف ہے۔ لان چھانگ -میکانگ خصوصی فنڈ نے 1000 سے زائد ترقیاتی منصوبوں کی حمایت کی ہے، جو لان چھانگ -میکانگ کے تمام ممالک میں عوام کو فائدہ پہنچا رہا ہے اور عام لوگوں کے لیے حقیقی خوشحالی لا رہا ہے۔انہوں نے کہا کہ تمام چھ وزرائے خارجہ نے اتفاق کیا کہ لان چھانگ -میکانگ فیملی کو اس موقع کو استعمال کرتے ہوئے پانچویں سربراہ اجلاس کے لیے تیاری کرنی چاہیے تاکہ تعاون کو نئی بلندیوں تک پہنچایا جا سکے۔ وانگ ای نے کہا کہ چین میکانگ کے ممالک کے ساتھ مل کر مزید مضبوط اقدامات کے ذریعے مشترکہ طور پر جدیدیت حاصل کرے گا۔
اجلاس کے وقفے کے دوران، وانگ ای نے کمبوڈیا کے نائب وزیراعظم اور وزیر خارجہ پرامب سوکون اور تھائی لینڈ کے نائب وزیراعظم اور وزیر خارجہ سیہاسک پھوانگک ٹکیو کے ساتھ چائے کی نشست پر ایک ملاقات بھی کی ۔ملاقات میں تینوں فریقوں کے مابین تعاون کو مضبوط بنانے، علاقائی استحکام کا تحفظ کرنے، کمبوڈیا اور تھائی لینڈ کے درمیان اعتماد سازی کے اقدامات کو فروغ دینے اور تعلقات کو بہتر بنانے کے حوالے سے تعمیری تبادلہ خیال ہوا۔
