26 مئی 2026(پیپلز ڈیلی آن لائن) 25 مئی کو ،کمیونسٹ پارٹی آف چائنا کی مرکزی کمیٹی کے سیاسی بیورو کے رکن اور چینی وزیرِ خارجہ وانگ ای نے پاکستان کی مسلح افواج کے سربراہ فیلڈ مارشل سید عاصم منیر سے ملاقات کی۔
وانگ ای نے وزیرِ اعظم شہباز شریف کے ہمراہ فیلڈ مارشل سید عاصم منیر کے دورۂ چین کا خیر مقدم کرتے ہوئے کہا کہ چین اور پاکستان کی دوستی ہمیشہ چٹان کی مانند مضبوط اور ناقابلِ شکست رہی ہے۔انہوں نے کہا کہ دونوں ممالک کے درمیان اعلیٰ سطح کا سیاسی اعتماد، عملی تعاون اور بین الاقوامی اشتراک موجود ہے، جس نے عالمی سطح پر تعلقات کی ایک عمدہ مثال قائم کی ہے۔ وانگ ای نے اعتماد ظاہر کیا کہ پاکستانی فوج چین۔پاکستان روایتی دوستی اور دونوں ممالک کے مشترکہ مستقبل کے حامل معاشرے کی تشکیل کو مزید مضبوط بنانے میں نئی خدمات انجام دے گی۔
فیلڈ مارشل سید عاصم منیر نے کہا کہ پاکستان ، پاک۔چین آہنی دوستی پر فخر محسوس کرتا ہے۔ انہوں نے کہا کہ پاکستان صدر شی جن پھنگ کی جانب سے پیش کردہ چار گلوبل انیشی ایٹوز اور بیلٹ اینڈ روڈ انیشی ایٹو میں بھرپور حمایت اور فعال شرکت جاری رکھے گا ۔ انہوں نے کہا کہ پاکستانی فوج ، پاک-چین مشترکہ مستقبل کے حامل معاشرے کی تشکیل نیز چین-پاکستان اقتصادی راہداری کی ترقی کے لیے مکمل تعاون جاری رکھے گی۔فیلڈ مارشل عاصم منیر نے امریکا اور ایران کے درمیان کشیدگی میں ثالثی کی تازہ صورتحال سے بھی آگاہ کیا اور بتایا کہ معاہدہ طے پانے کے قریب ہے۔
وانگ ای نے پاکستان کی کوششوں کو سراہتے ہوئے کہا کہ چین ان اقدامات کی حمایت کرتا ہے۔ انہوں نے کہا کہ امن کا حصول اگرچہ مشکل عمل ہے، تاہم آخرکار امن ضرور قائم ہوگا۔
