23 ستمبر 2026 (پیپلز ڈیلی آن لائن) عوامی جمہوریہ چین کے قیام کی 77ویں سالگرہ اور وسطِ خزاں تہوار کی مناسبت سے 22 ستمبر کو اسلام آباد میں ایک استقبالیہ تقریب کا انعقاد کیا گیا۔ تقریب میں چین اور پاکستان کے سرکاری عہدیداران، پاکستان اوورسیز چائنیز ایسوسی ایشن(POCA)، چائنا چیمبر آف کامرس اِن پاکستان(CCCPK)، پاکستان میں کام کرنے والی چینی کمپنیز اور اداروں، ذرائع ابلاغ کی تنظیموں، چینی طلبہ اور پاکستان میں مقیم چینی برادری کے نمائندگان نے شرکت کی۔
پاکستان میں چین کے سفیر جیانگ زائی دونگ نے تقریب سے خطاب کرتے ہوئے پاکستان میں مقیم چینی باشندوں کو چین کے قومی دن اور وسط خزاں تہوار کی مبارک باد دی اور چین-پاکستان دوستی کے فروغ میں ان کی خدمات کو سراہا۔
جیانگ زائی دونگ نے کہا کہ گزشتہ 77 برسوں میں چین نے اقتصادی اور سماجی ترقی کے میدان میں نمایاں کامیابیاں حاصل کی ہیں۔ چین اعلیٰ معیار کی ترقی کو آگے بڑھاتا رہے گا، چینی طرز کی جدیدیت کے ثمرات دنیا کے ساتھ بانٹے گا اور پاکستان کے ساتھ چین کی ترقی کے مزید ثمرات کا اشتراک کرے گا۔ انہوں نے کہا کہ دونوں ممالک نئے دور میں مزید قریبی چین-پاکستان مشترکہ مستقبل کے حامل معاشرے کے قیام کے لیے مل کر کام کریں گے۔
انہوں نے پاکستان میں مقیم چینی برادری، چینی کمپنیز اور اداروں سے وابستہ افراد، میڈیا کارکنان اور طلبہ کی خدمات کو سراہتے ہوئے کہا کہ انہوں نے چین اور پاکستان کے درمیان عملی تعاون، عوامی تبادلوں اور باہمی افہام و تفہیم کے فروغ میں اہم کردار ادا کیا ہے۔
چینی برادری اور چینی کاروباری شعبے کے نمائندوں نے چین اور پاکستان کے درمیان تبادلوں اور عملی تعاون کے فروغ میں اپنے کردار کو اجاگر کرتے ہوئے، بیلٹ اینڈ روڈ کی مشترکہ تعمیر اور چین-پاکستان اقتصادی راہداری کی اعلیٰ معیار کی ترقی میں چینی کمپنیز کی شرکت کا بھی ذکر کیا، جس میں توانائی، بنیادی ڈھانچے، ڈیجیٹل معیشت اور سبز ترقی کے شعبوں کے علاوہ مقامی برادریوں کی معاونت اور سماجی ذمہ داری سے متعلق اقدامات بھی شامل ہیں۔
استقبالیے میں ثقافتی پروگرام بھی پیش کیے گئے، جن میں روایتی چینی ساز گُوژینگ سمیت، نغمے اور کلاسیکی رقص شامل تھے، جس سے قومی دن اور وسطِ خزاں تہوار کی مناسبت سے منعقدہ تقریب کا ماحول مزید خوشگوار ہو گیا۔
