29 ستمبر 2026 (پیپلز ڈیلی آن لائن)28 ستمبر کو، یومِ دفاع پاکستان کی مناسبت سے بیجنگ میں ایک پروقار استقبالیہ تقریب کا انعقاد کیا گیا۔ چین میں تعینات مختلف ممالک کے دفاعی اتاشی، چین کی سیاسی و فوجی شخصیات، تھنک ٹینکس، تعلیمی و کاروباری اداروں کے نمائندگان اور چین میں مقیم پاکستانیوں کی ایک بڑی تعداد نے تقریب میں شرکت کی۔
پاکستان ایمبیسی کالج کے طلبہ پاکستان اور چین کے قومی ترانے پیش کر رہے ہیں۔(تصویر بشکریہ، پاکستانی سفارت خانہ)
تقریب کے آغاز پر پاکستان ایمبیسی کالج کے طلبہ نے پاکستان اور چین کے قومی ترانے پیش کیے جس کے بعد پاکستان کی مسلح افواج کی کامیابیوں، وطن کے دفاع میں شہدا کے کارناموں اور قومی عزم و قربانی کے جذبے کو اجاگر کرتی خصوصی دستاویزی فلم پیش کی گئی۔
چین میں پاکستان کے ڈیفنس اتاشی، بریگیڈیئر جنرل علی اصغر خان تقریب سے خطاب کر رہے ہیں۔(پیپلز ڈیلی آن لائن---فراز)
چین میں پاکستان کے ڈیفنس اتاشی، بریگیڈیئر جنرل علی اصغر خان نے تقریب سے خطاب کرتے ہوئے، یومِ دفاع کے تاریخی پس منظر کو بیان کیا اور ملک کے لیے جانوں کا نذرانہ پیش کرنے والے شہدا کو خراجِ عقیدت پیش کیا۔ انہوں نے پاکستان کی مسلح افواج کی جدیدیت اور دہشت گردی کے خلاف کوششوں کا ذکر کرتے ہوئے، پاکستان کی بلا مشروط حمایت پر چین کی پیپلز لبریشن آرمی کا شکریہ ادا کیا، چینی اور پاکستانی افواج کے سٹریٹجک تعلقات کو سراہا اور چین کی پیپلز لبریشن آرمی کے قیام کی 99ویں سالگرہ پر مبارک باد پیش کی۔
پاکستان کے چارج ڈی افیئرز، اعزاز خان تقریب سے خطاب کر رہے ہیں۔ (پیپلز ڈیلی آن لائن---فراز)
پاکستان کے چارج ڈی افیئرز، اعزاز خان نے تقریب سے خطاب کرتے ہوئے کہا کہ چین-پاکستان "ہمہ موسمی سٹریٹجک تعاون کے شراکت دار" ہیں اور ان کی مضبوط دوستی نے بین الاقوامی حالات میں آنے والی تبدیلیوں کا مقابلہ کیا ہے۔ دونوں ممالک کے درمیان سیاسی، اقتصادی اور دفاعی شعبوں سمیت متعدد شعبوں میں تعاون کے بے شمار مثبت نتائج سامنے آئے ہیں۔ اعزاز خان نے مزید کہا کہ دفاعی تعاون دو طرفہ شراکت داری کی اہم بنیاد ہے، جو علاقائی امن و استحکام میں قابلِ ذکر کردار ادا کرتا ہے۔ انہوں نے چین کی جانب سے پاکستان کی خودمختاری اور ترقی کی مضبوط، طویل مدتی حمایت پر شکریہ ادا کرتے ہوئے دونوں ممالک کی مشترکہ ترقی کے لیے چین-پاک اقتصادی راہداری کی اہمیت کو "بیلٹ اینڈ روڈ" کی مشترکہ تعمیر کا اہم منصوبہ قرار دیا۔
چینی اور پاکستانی حکام نے ایک دوسرے کو یادگاری تحائف پیش کیے۔(تصویر بشکریہ، پاکستانی سفارت خانہ)
تقریب میں، چینی اور پاکستانی حکام نے دوستانہ جذبات کا اظہار کرتے ہوئے ایک دوسرے کو یادگاری تحائف پیش کیے۔ اس تقریب نے چین-پاک ہمہ موسمی دوستی کو مزید اجاگر کیا، دونوں ممالک کے دفاعی تعاون کو مسلسل گہرا کرنے اور چین-پاکستان مشترکہ مستقبل کے حامل معاشرے کی زیادہ مضبوط تعمیر کے لیے اتفاقِ رائے پیدا کیا۔
