5 جنوری کی سہ پہر، بیجنگ کے عظیم عوامی ہال میں چینی صدر شی جن پھنگ نے چین کے سرکاری دورے پر آئے ہوئےجنوبی کوریا کے صدر لی جے میونگ کے ساتھ ملاقات کی ۔
شی جن پھنگ نے کہا کہ چین نے ہمیشہ چین- جنوبی کوریا تعلقات کو اپنی ہمسایہ سفارت کاری میں ایک اہم مقام دیا ہے اور جنوبی کوریا کے ساتھ اپنی پالیسی میں تسلسل اور استحکام کو برقرار رکھا ہے۔ چین ، جنوبی کوریا کے ساتھ مل کر چین-جنوبی کوریا سٹریٹجک تعاون پر مبنی شراکت داری کو ایک مثبت سمت میں فروغ دینے، دونوں ممالک کے عوام کی فلاح و بہبود کو بڑھانے نیز خطے اور عالمی امن و ترقی میں مثبت توانائی فراہم کرنے کا خواہاں ہے۔ شی جن پھنگ کا کہنا تھا کہ چین اور جنوبی کوریا ،علاقائی امن برقرار رکھنے اور عالمی ترقی کو فروغ دینے کے سلسلے میں اہم ذمہ داریاں نبھاتے ہیں اور ان کے مشترکہ مفادات بے حد وسیع ہیں۔ دونوں ممالک کو ثابت قدمی کےساتھ تاریخ کی درست سمت میں رہتے ہوئے صحیح حکمت عملی کا انتخاب کرنا ہوگا۔شی جن پھنگ کا کہنا تھا کہ چین اور جنوبی کوریا کو مشترکہ طور پر تحفظ پسندی کی مخالفت کرتے ہوئے حقیقی کثیرالجہتی پر عمل کرنا چاہیے اور ایک مساویانہ اور منظم کثیر قطبی دنیا نیز جامع اقتصادی عالمگیریت کو فروغ دینے میں اپنا کردار ادا کرنا چاہیے۔
لی جے میونگ نے کہا کہ جنوبی کوریا اور چین نے مل کر جاپان کی فوجی جارحیت کے خلاف جنگ لڑی تھی۔ جنوبی کوریا، چین میں کوریا کی تحریک آزادی کے مقامات کی حفاظت کے لیے چین کا شکر گزار ہے۔ جنوبی کوریا ،چین کے ساتھ اپنے تعلقات کو بہت اہمیت دیتا ہے اوراختلافات کو پس پشت ڈال کر دونوں ممالک کے درمیان سٹریٹیجک تعاون پر مبنی شراکت داری کو مزید گہرا کرنا چاہتا ہے۔ انہوں نے کہا کہ ان کا ملک ،چین کے مرکزی مفادات اور اہم خدشات کے حامل امور کا احترام کرتا ہے اور ایک چین کے اصول پر کاربند ہے۔
لی جے میونگ کا کہنا تھا کہ جنوبی کوریا چین کے 15ویں پانچ سالہ منصوبے کے ذریعے سامنے آنے والے مواقع سے فائدہ حاصل کرنےکی خواہش رکھتا ہے تاکہ دونوں ممالک کے درمیان عملی تعاون مزید نتیجہ خیز ہو سکے ۔ دونوں ممالک کے عوام کے درمیان تبادلوں کو فروغ دینا ضروری ہے اس سے باہمی افہام و تفہیم اور اعتماد کو بڑھایا جاسکتا ہے۔انہوں نے کہا کہ جنوبی کوریا عالمی خوشحالی اور ترقی کے لیے خدمات سرانجام دینے میں چین کے ساتھ کثیرالجہت تعاون کو مضبوط بنانے کا خواہاں ہے۔
ملاقات کے بعد، دونوں سربراہان مملکت نے سائنسی و تکنیکی اختراعات، ماحولیاتی تحفظ، نقل و حمل اور اقتصادی و تجارتی تعاون سمیت دیگرشعبوں سےمتعلقہ تعاون کی پندرہ دستاویزات پر دستخط کیے جانے کے عمل کا مشاہدہ کیا ۔ اسی شام، شی جن پھنگ اور ان کی اہلیہ پھنگ لی یوان ن کی جانب سے لی جے میونگ اور ان کی اہلیہ کے اعزاز میں استقبالیہ ضیافت کا اہتمام بھی کیا گیا۔
