امریکہ میں چین کے سفارت خانے میں 30 مئی کو "پکل بال نائٹ " کی ایک تقریب منعقد ہوئی۔ اس موقع پر امریکہ میں چین کے سفیر شیے فینگ نے اپنے خطاب میں کہا کہ پنگ پونگ سے پکل بال تک ریکیٹ بدلا ہے، لیکن دونوں ممالک کے عوام کی دوستی کی خواہش اور نیک نیتی آج بھی برقرار ہے۔
اسی شام چینی سفیر نے "پکل بال" کے امریکی وفد کے طلبہ، اساتذہ اور والدین کے ساتھ خوشگوار وقت گزارا اور چین اور امریکہ کے نوجوانوں کے درمیان "کھیل کے ذریعے دوستی " سے "دلوں کے باہمی تعلق " تک کے خوبصورت سفر کو یاد کیا۔
شیے فینگ نے کہا کہ دونوں ممالک کے نوجوانوں کو موسمیاتی تبدیلی، مصنوعی ذہانت، عوامی صحت اور غذائی تحفظ جیسے عالمی چیلنجز پر توجہ دینی چاہیے اور مشترکہ مستقبل کے حامل انسانی معاشرے کے تصور کو عملی جامہ پہنانے میں فعال کردار ادا کرنا چاہیے۔ انہوں نے کہا کہ اس وقت چین اور امریکہ کے تعلقات ایک نئے تاریخی نقطۂ آغاز پر ہیں، لہٰذا دونوں ممالک کو مل کر چین-امریکہ تعلقات کی مستحکم، صحت مند اور پائیدار ترقی کو فروغ دینا چاہیے۔
