3 جون 2025 (پیپلز ڈیلی آن لائن ) ہائیکو کی آتش فشاںی مٹی میں اگنے والی لیچی کی ریکارڈ فروخت اور عالمی مانگ میں اضافہ
چین کےصوبہ ہائی نان کے صوبائی دارالحکومت ہائیکو کی آتش فشانی مٹی میں اگنے والی لیچی کی مقبولیت اور مانگ میں اضافہ ہو رہا ہے ۔ چینی قمری کیلنڈر کی 7ویں شمسی اصطلاح لی شیا کا آغاز ہوتے ساتھ ہی لیچی کے پھل کی چنائی کا موسم شروع ہو جاتا ہے۔ یہ شمسی اصطلاح موسم گرما کے آغاز کا اعلان ہے۔
اپنی مٹھاس اور ہلکے سے کھٹے پن کی وجہ سے یہ لیچی بیش قیمت مانی جاتی ہے اور ای کامرس پلیٹ فارمز پر بے حد مقبول ہو چکی ہے۔
پھل کو درخت سے صارف کی میز تک محض 36 گھنٹوں میں پہنچا دینے والی سپلائی چین کے باعث ، قلیل مدت میں پک کر تیار ہونے اس ذائقے دار لیچی نے نہ صرف چین بھر میں صارفین کی توجہ حاصل کی ہے بلکہ اب یہ متحدہ عرب امارات اور روس کی منڈیوں میں بھی برآمد کی جا رہی ہے۔
ہائیکو کے آتش فشاں والے علاقے میں لیچی کی کاشت کا آغاز 2,000 سال سےبھی پہلے ہوا تھا۔ ہائیکو میں لیچی کی کاشت کا نظام قدرتی پیوند کاری کے لیے جانا جاتا ہے ۔اس نظام کو جون 2017 میں، چین میں قومی سطح پر ایک اہم زرعی ورثے کے نظام کی جگہ کے طور پر تسلیم کیا گیا تھا۔
لیچی کا پھل ، ہائیکو کے کئی خاص کھانوں کا ایک اہم جزو ہے، مثلاً نمکین پانی میں ڈوبی ہوئی ٹھنڈی یخ لیچی ، لیچی کے ساتھ بنا ہوا چکن سوپ ، لیچی پف اور اسموتھیز وغیرہ ۔ لیچی کی صنعت کی توسیع کے لیے ڈیپ پروسیسنگ کو اپنایا گیا ، جس سے نئے مصنوعات جیسے لیچی چائے ، خوشبویات، خشک لیچی،نیز شہد اور لیچی کے ذائقے والے مشروب تیار کیے جا رہے ہیں۔
اس علاقے میں لیچی کی کاشت کے عروج سے شعبہ سیاحت بھی مستفید ہورہا ہے۔ آتش فشانی علاقے کے قدیم گاؤں کی ورکشاپس میں یہاں آنے والے سیاحوں کو اس پھل کی تاریخ سے متعارف کروایا جاتا ہے، جبکہ موسم گرما کے لیچی بازار اور لہلہاتے پھولوں کے میدانوں میں تفریح کے لیے منعقدہ دوڑیں سیاحوں کی ایک بڑی تعداد کو اپنی جانب متوجہ کر رہی ہیں۔
توقع ہے کہ 2025میں ہائیکو میں لیچی کی پیداوار 87,900 ٹن تک پہنچ جائے گی جبکہ کل فروخت 1.6 بلین یوان (223 ملین ڈالر) سے تجاوز کر جائے گی ۔
پھلوں کی چنائی کے موسم کے پہلے ہی دن ، فروخت کے معاہدے 220 ملین یوآن سے تجاوز کر چکے تھے جب کہ ملک بھر سے 411 ملین یواآن کے پیشگی آرڈرز مل چکے ہیں۔ جیسے جیسے مزید اقسام مارکیٹ میں آتی جائیں گی ، تھوک میں کی جانے والی خریداری اور آن لائن آرڈرز میں بھی اضافہ ہوتا رہے گا ۔
