یورپ بھر میں ہیٹ ویو برقرار، فرانس سب سے زیادہ متاثر

یورپی موسمیاتی اداروں کے مطابق 11 اور 12 جولائی کو یورپ کے مختلف علاقوں میں شدید گرمی کی لہر برقرار رہے گی، جبکہ فرانس اس ہیٹ ویو سے سب سے زیادہ متاثر ہونے والا ملک ہے۔ اطلاعات کے مطابق فرانس کا تقریباً ایک چوتھائی حصہ شدید گرمی کے باعث ریڈ الرٹ کی بلند ترین سطح پر آ چکا ہے۔ بڑھتے ہوئے درجہ حرارت کے پیشِ نظر ایفل ٹاور کی انتظامیہ نے اعلان کیا ہے کہ 11 اور 12 جولائی کو ٹاور معمول سے پہلے، شام 4 بجے بند کر دیا جائے گا۔اسی طرح پیرس کے دو معروف عجائب گھر، لوور میوزیم اور میوزی ڈی اورسے نے بھی اپنے اوقاتِ کار میں تبدیلی کر دی ہے۔ لوور میوزیم 13 جولائی تک روزانہ شام 4 بجے بند ہوگا، جبکہ میوزی ڈی اورسے 15 جولائی تک شام 5 بجے بند کیا جائے گا۔ادھر موسمی پیش گوئی کے مطابق آئندہ ہفتے بیلجیئم کے متعدد علاقوں میں درجہ حرارت 32 ڈگری سینٹی گریڈ سے تجاوز کر سکتا ہے۔ شدید گرمی کے باعث شہری بڑی تعداد میں پارکوں اور سایہ دار مقامات کا رخ کر رہے ہیں تاکہ گرمی کی شدت سے بچ سکیں۔