10 اگست کو امریکی صدر ڈونلڈ ٹرمپ نے سوشل میڈیا پر ایک پوسٹ میں کہا کہ انہوں نے نوٹس لیا ہے کہ ایران گزشتہ پانچ ماہ کے دوران ہونے والے فوجی تنازع میں پہنچنے والے نقصانات کے ازالے کا مطالبہ کر رہا ہے۔ ٹرمپ نے کہا کہ وہ بھی ایران سے ہرجانے کا مطالبہ کریں گے اور انہوں نے اپنے نمائندوں کو ہدایت کی ہے کہ مستقبل میں ہونے والے تمام مذاکرات میں اس مطالبے کو واضح طور پر شامل کیا جائے۔ٹرمپ کے مطابق امریکہ ایران سے "سڑک کنارے نصب بموں اور متعدد تنازعات" میں ہونے والی ہلاکتوں کے معاوضے کا مطالبہ کرے گا۔ ان میں امریکی بحری جہاز یو ایس ایس کول پر حملے میں ہلاک ہونے والے افراد کے لواحقین اور دیگر لڑائیوں میں ہلاک ہونے والے ہزاروں افراد کے لیے معاوضہ بھی شامل ہے۔
ٹرمپ نے مزید کہا کہ امریکہ نے آبنائے ہرمز میں مائن کلیئرنس کا عمل مکمل کر لیاہے اور اب امریکی بحریہ کو اس اہم آبی گزرگاہ پر "100 فیصد" کنٹرول حاصل ہے۔ ان کے مطابق امریکی فوج نے ایران کی بحری ناکہ بندی بھی جاری رکھی ہوئی ہے اور صرف انہی بحری جہازوں کو آبنائے ہرمز سے گزرنے کی اجازت دی جا رہی ہے جنہیں امریکہ اجازت دیتا ہے۔ دوسری جانب امریکی سینٹرل کمانڈ نے 9 تاریخ کو کہا کہ امریکہ نے ایران کے خلاف ناکہ بندی کے اقدامات کو مؤثر انداز میں نافذ کرنے کے لیے مشرقِ وسطیٰ میں 20 سے زائد جنگی جہاز تعینات کیے ہیں۔ امریکی فوج کے مطابق اس وقت تک 55 تجارتی بحری جہازوں کو اپنے راستے تبدیل کرنے پر مجبور کیا جا چکا ہے۔
